1Ti 3 | MED | STEP | Ik kupa ei, petᵾm mel nᵾnt, wu ti, elim Got nga rapa tenda ila wamp mbᵾ nga rᵾp wu ti, muⱡimp nimba pilim ndam, kongun kai ei etmba.

1 Timothy 3

Atinga Manga Wingti Rᵾp Wu Mbᵾ Nga Man Ik

1 Ik kupa ei, petᵾm mel nᵾnt, wu ti, elim Got nga rapa tenda ila wamp mbᵾ nga rᵾp wu ti, muⱡimp nimba pilim ndam, kongun kai ei etmba. 2 Got nga rapa tenda wamp mbᵾ, rᵾp itimp nimba pilim ndam, wamp nga kuimp keta ila, elim wu kai, ⱡawa ti mon, amp tenda ti tangga, popᵾⱡ mundi namᵾndpa, elim nga orunga rᵾp etpa kai mondpa omba, kona elpa wamp mbᵾ, elim nga manga ila rawe etpa tᵾpa, ik mbo endpa, nu ronduⱡ mbᵾ nui nandᵾpa, koma pou raⱡ tepa, kara pi napᵾpa, ku moni numan ou ndupa, ngui ngᵾngangga mon! 4 Wu ei, elim nga mang kona amp kangambuⱡa wamp mbᵾ, rᵾp etpa kai mondpa, wote elim nga kangambuⱡa mbᵾ man ngangga, elim tᵾk ou nduk ik kum teing. 5 Wu ti, elim nga amp kangambuⱡa wamp mbᵾ, rᵾp etpa kai mundi namᵾndᵾm ndam, wote, Got nga rapa tenda ila wamp mbᵾ, etpa rᵾp etmba mel nant? 6 Wu ei, kokila, numan ropᵾl rom ti mon. Nambuⱡ emel, Seitan ei, itim ei mel, elim nga kᵾng orunga mepa oⱡa pum ndam, mba uⱡ kit ila mana mba. 7 Wu ei, mbo wamp ekit orunga mbᵾ ndi, tᵾk ou nduk etmin wu ti. Ei nambuⱡ emel, elim wamp mbᵾ nga pipil kuⱡi naⱡᵾmba, wote elim, Seitan nga mil ila rui narᵾmba.

Atinga Manga Tᵾpa Rᵾpᵾndi Wu

8 Got nga rapa tenda tᵾpa rᵾpᵾndi wu kᵾⱡ molk, uⱡ kun kai mbᵾ etᵾk, ik kun mbᵾ nᵾk, nu nok, kupᵾr rui narᵾk, omba wamp ti nga kng mel mbᵾ kandᵾk, kum pindi napᵾndᵾk, wu kᵾⱡ kapⱡa, Got kᵾn mondpa pili uⱡ kupa ei, ambuⱡ gi nduk, numan orunga eng nangga muⱡeing. 10 Kuimp tek wu kᵾⱡ, kongun ila tᵾk mondᵾk kᵾnangina, kongun etᵾk kun mundung ndam, wote wak rangina, kongun iteing. 11 Wu kᵾⱡ nga ambᵾmᵾl kᵾⱡ, uⱡ ei mel ku etᵾk molk, kai mondᵾk, ik mbuldung orunga ni nandᵾk, uⱡ kai mbᵾ etᵾk, wote ik kupa mbᵾ nᵾk iteing. 12 Got nga rapa tenda ila tᵾpa rᵾpᵾndi wu ei, amp tenda ti tᵾpa, wote elim nga mang kona amp kangambuⱡa mbᵾ, rᵾp etpa kai mondpa itangga. 13 Kongun etᵾk kai mondurmᵾn wu mbᵾ, wamp ndi, tᵾk ou ndangina, wote Jisas Kraist nga Rᵾnang Ik Kai ei, en enim mondᵾk pᵾtmᵾn ei, ronduⱡ mundᵾk ning.

Uⱡ Mam Ti, Mo Ropa Titim

14 Na mon ei, rop ngunt ei kᵾn, nim nondpa omp kᵾnimp ei nga, wote ya ik kᵾⱡ, unt man ngamp. 15 Wote, na nondpa ui nᵾwᵾnt ndam, ya mon ei ndi, tᵾn Got kᵾn ronduⱡ mundpᵾn muⱡmin ei mel, tᵾpa ora ndumba. Got rᵾk rᵾk kont morum ei nga rapa tenda ila mormin wamp mbᵾ, manga paka rumᵾnt na ei mel, ik kupa ei koma rok mormin. 16 Wamp ti ndi, tᵾn Got kᵾn mbi paka ronmᵾn uⱡ ei, oⱡa oⱡa tetᵾm ni nanᵾmba. Ik mo ropa pinditim, akup pᵾnmᵾn ei, ik mam ti. Wu ei, wamp kᵾng tᵾpa, Muⱡnga Wingti ei ndi, elim nga puⱡ ei, tᵾpa mot ndurum. Ei kupa, wote anggelo mbᵾ ndi kandrung. Wu ei nga ik puⱡ mbᵾ, ya mᵾi kona ila nᵾk ngurmᵾn. Mᵾi kona wamp mbᵾ ndi, ik ei mondᵾk pᵾtᵾng. Wote wu ei, muⱡ kona ila oⱡa titim.